hlidaskoli

Nú er söngleikjavinnan komin í fullan gang og mikið um að vera í unglingadeildinni. Stífar æfingar eru nú þegar hafnar og sviðsmynda-, búninga- og tæknimannahópar eru að hefja sína vinnu. Einnig er starfandi ljósmynda- og upptökuteymi sem mun sjá um skráningu verkefnisins og fréttafluttning. Dansarar og tónlistarmenn koma inn í vinnuna í þessari viku og í framhaldi af því markaðs- og leikskrárhópur.

Tíminn flýgur áfram og 17. mars sem er frumsýningardagur nálgast óðfluga. 
Þess vegna hefjast enn þéttari æfingar nú í vikunni þar sem kvöldæfingar bætast við.

Þessa vikuna var farið vandlega yfir handritin, bæði með samlestri og auk þess verða senurnar unnar. 
Einnig funduðu förðun, búningar og sviðsmynd og töluðu um vinnu sína og hvernig ferli þeirra muni vera.

Frá fyrsta degi hafa nemendur 1. bekkjar talið dagana í skólanum með því að bæta einu sogröri í krukku fyrir hvern dag. Nú eru dagarnir orðnir 100 og af því tilefni var haldin hundraðdagahátíð föstudaginn 3. febrúar s.l.

Börnin höfðu daginn áður búið sér til kórónur með áletruninni "100" og stolt settu þau kórónurnar upp að morgni hátíðarinnar. Unnin voru ýmis skemmtileg stærðfræðiverkefni tengd tölunni hundrað, t.d. byggðu krakkarnir úr 100 kubbum, teiknuðu samtals 100 hluti á blað, bjuggu til klippimyndir og unnu með hundraðtalnatöflu á Smart-töflunni.

Eftir hádegismatinn var hápunkturinn en þá fengu krakkarnir 100 stk. af ýmsu góðgæti. Tegundirnar voru 10 og hvert barn fékk 10 stk. af hverri tegund. Allir voru alsælir með góðgætið og daginn og fóru sáttir inn í helgina með þau fyrirmæli að æfa sig að telja upp að hundrað heima.

Fleiri myndir frá hundraðdagahátíðinni eru í myndasafninu.·